ДЭЛХИЙН УСНЫ ӨДӨР

1992 онд Нэгдсэн Үндэстний Байгууллагын Хүрээлэн буй орчин, Хөгжлийн тухай олон улсын хурлын (UNCED) үеэр дэлхийн усны тэмдэглэлт өдөртэй болох саналыг дэвшүүлж, улмаар НҮБ-ын Ерөнхий Ассамблейгаас 1992 оны 12 дугаар сарын 22-ны өдөр A/RES/47/193 тоот тогтоолоор жил бүрийн 3 дугаар сарын 22-ны өдрийг “Дэлхийн усны өдөр” болгон зарлан тунхагласан.

Жил бүрийн Дэлхийн усны өдрийг усны тодорхой сэдвийн доор тэмдэглэн өнгөрүүлдэг бөгөөд улс орнуудад устай холбоотой аливаа асуудлын талаар мэдлэг, мэдээлэл солилцох, бусдад түгээх, өөрчлөлт хийх, хэлэлцэх боломжийг олгодог ач холбогдолтой.

Нэгдсэн Үндэстний Байгууллагаас 2022 оны Дэлхийн усны өдрийг “Газрын доорх ус” сэдвийн доор бидний нүдэнд үл харагдах далд баялаг болох газрын доорх усыг судлах, үнэ, цэнийг таниулах, бохирдол, хомстлоос хамгаалах, уур амьсгалын өөрчлөлтөд дасан зохицох , өсөн нэмэгдэж буй хэрэгцээг хангах, нөөцийг зохистой ашиглах оновчтой менежмент хийхэд улс орнуудыг хамтран ажиллахыг уриалсан байна.

Манай дэлхийн усны нийт нөөц 1,386 тэрбум км3 бөгөөд 97,5 хувь нь далай тэнгисийн шорвог ус, зөвхөн 2.5 хувь нь цэнгэг ус эзэлдэг. Цэнгэг усны нөөцийн 68.7 хувь нь цас, мөсөн бүрхүүл, 30.1 хувь газрын доорх ус, 1.2 хувь нь гол, мөрөн, нуурын ус юм.

Газрын доорх ус нь амин чухал нөөц баялаг бөгөөд дэлхийн нийт хүн амын ундны усны хэрэглээний 50 хувь, хөдөө аж ахуй, газар тариалангийн салбарын ус хангамжийн 40 хувь, үйлдвэрийн ус хангамжийн 30 хувийг газрын доорх усаар хангаж байна.

Дэлхийн усны өдрийг угтан Усны газар нь төрийн болон төрийн бус байгууллагууд, их дээд сургуулиуд, эрдэм шинжилгээ, судалгааны хүрээлэн, ус ашиглагч, хэрэглэгч, иргэн, аж ахуйн нэгж, хэвлэл мэдээлэл, олон улсын байгууллагуудтай хамтран ажиллаж байна.

2022 оны Дэлхийн усны өдрийн сэдвийг усны салбарын болон хэл шинжлэлийн салбарын эрдэмтэн, багш нартай зөвлөлдөж Монгол хэлнээ орчуулсныг та бүхэнд хүргэж байна.